StoryLab ju fton të aplikoni për këtë seri 6-javore punëtorish dhe ligjëratash që përqëndrohen në krijimin e librave të artit dhe zinave/revistëzave. Me përfundimin e këtij programi në nivel universitar, pjesëmarrësit do të kenë përfunduar të paktën një zinë apo libër arti për tu botuar në bashkëpunim me StoryLab.

Pavarësisht avancimeve teknologjike, libri mbetet një nga mediumet akoma të patejkaluara për përçimin e informacionit. Kështuqë, punëtoritë do fokusohen në eksplorimin e origjinës së librave të artit dhe evolimin e tyre përgjatë viteve. Gjithashtu, do të përfshihen tema tjera si e ardhmja e librit, kombinimin e mediave analoge me ato digjitale, përdorimi i fotografisë dhe ilustrimeve, eksperimente të ndryshme me forma hibride tekst-imazh, botimi nën buxhet dhe mjete të kufizuara, botimi si përpjekje shoqërore e komunitare, etj.

Secili pjesëmarrës do të konceptualizojë, përpunojë, dhe përfundojë një punim të gatshëm për botim, që mund të ketë formën e një libër arti, zinës, katalogut, apo çfarëdo eksperimenti tjetër në botim. Teknikat krijuese do të shkojnë përtej shtypit e punimeve digjitale dhe mund të përfshijnë edhe vepra të artit konceptual.

Koha dhe vendi

Programi 6-javor do të përfshijë punëtori, ligjërata, diskutime në grup, sesione pune, vizita studimore, etj.

Programi do të mbahet fizikisht në Prishtinë, tek hapësira e StoryLab. Për lehtësi të pjesëmarrësve tanë ndërkombëtarë, do të ofrojmë gjithashtu mundësinë për t’i ndjekur punëtoritë online.

Programi pritet të fillojë në fund të shtatorit 2025 dhe të përfundojë në fillim të nentorit 2025.

Formati

Punëtoria do të drejtohet nga Artrit Bytyçi, M.F.A. në Shkrim Kreativ nga The New School në New York City, i cili do të përdorë përvojën e tij të punës në industrinë e librave të artit në New York. Programi, gjithashtu, është i ndërtuar dhe zgjeruar mbi si përvojën e klasës për libra arti dhe zina që Artrit Bytyçi përgjatë 7 viteve e ka zhvilluar për dhe ligjëruar në mjedis universitar në Kosovë.

Programi do të ketë ligjërues mysafirë me përvojë në krijimin dhe botimin e librave të artit e zinave, proçeset redaktuese, fotografi, dizajn, art konceptual, etj.

Programi përmbanë gjithsejt 12 sesione, me rreth 8-10 pjesëmarrës, dhe do të mbahet dy herë në javë.

Aplikimi

Ky program është falas për pjesëmarrësit.

Ju lutemi sigurohuni që të aplikoni përpara afatit: 5 shtator 2025.

Klikoni këtu për të plotësuar Aplikimin.

Nëse keni ndonjë pyetje, ju lutemi na shkruani në info@storylab.al.

Ky program u mundësua me mbështetjen e Ministrisë së Kulturës, Rinisë dhe Sportit të Republikës së Kosovës.